Poesiis e liendis sot la Mariane

La poesie di Renzo Balzan e je un manifest di estetiche sclete, clare e cence nainis. Meti tal titul la mont di tumieç nol è dome une sielte gjeografiche. Culì si à di fevelâ di apartignince teritoriâl al ambient scuasit in ogni rie. Cjargne, Tumieç, Tajament, la Mariane, la tor Picote, Pani, Belen, ma ancje Clanfurt o la Val Carintiane de Gail: chei chi a son i toponims doprâts. In dutis lis cuindis poesiis de racolte si pues cjatâ alc sul ambient. Al pues jessi il bosc, la tiere, un peç, la fumate, l’aghe frescje o il ram di mêl, pal artist a son simpri robis cjargnelis. L’afiet pal teritori al sburte di dentri lis sôs peraulis. Ogni tant si lei di amôr, di une dumble - le donzele, in antîc cjargnel - o si fevele di une pueme, tant a dî fantate. Ogni fantacine tes peraulis di Balzan e je la sublimazion freudiane dal so amôr pe Cjargne, pal teritori, pal bosc, pal peç e pal Tajament. La seconde part dal libri e presente sîs liendis. La prime e conte di un predi dal popul e di une “Predicje in Plêf”, cuintri lis malegraciis dai militârs di Napoleon che a pratindin di vê ducj i racolts tai lôr cuartîrs. La seconde part e je ambientade e a zire ator di une casere “tai Plans di Cjampées”, presentade dal artist come intai cuadris
dal pitôr Segantini. Daspò si cjate “la liende di Grigôr Sclâf”, un om ordenari vivut a te Glemone dal Cuatricent. Lis altris liendis a àn par titul: “la prucission dai Braulinèis”, “Simon al cîr la veretât” e “inamorât di Viole” (Varutti).