Nuovo Cui voi di une frute Visualizza ingrandito

Cui voi di une frute

per info: elisa@chiandetti.it

Nuovo prodotto

Autore: Marisa Gregoris

Maggiori dettagli

Dettagli

Dalla presentazione di Gottardo Mitri

“Il fûc, lis faliscjis che cui lôr zoucs a rivin a inmagâ i voi di chei che ju cjalin, prime ch’a si distudin dal dut.”

Nus pâr ch’al sedi chest il motîf ch’al compagne la racuelte che nus proferìs Marisa Gregoris. In cheste imagjine si po jodile cui siei voi di frute ch’e brame tant di tornâ a vivi i moments da la sô infanzie. Une infanzie che jê s’ingrampe come un frut dulà che si jôt protagonist di une abe. Ma jê e sa che no je une abe: ce che nus conte a son lis personis che le àn compagnade tai siei prins agns di vite. No si contente: jê e à chê di ri-creâ ancje l’ambient, l’aiar, i odôrs, i savôrs, i suns, lis emozions di chei moments. Lis liendis a fevelin di fats vivûts, a fevelin in particolâr di un mont imagjinât e governât dai animâi, a fevelin da la vite ta la nature. Come lis aghis, i ums che a deventin par jê compagns di vite, ur fevele, ur palese lis sôs malincuniis. I aiars no àn plui un non, ma si pandin su la muse frêts e taiants in Fevrâr, ma ch’a son “cuasi une cjaresse dilunc vie li’ gnots d’istât”.

Siei compagns a son i anemaluts che su di lôr e fâs cussì tant cont di dâur l’aministrazion di un paîs cun dutis lis malegraziis di vuê. Lu fâs cuntune sorte di parodie, ma che insom e à une nalitât morâl. Chest scjampon tal mont animâl nus mene a pensâ a lis alegoriis dal Parlement of foules di G. Chaucer, e o sin tal XIV secul, e ancje a alc di plui dongje, a chês dal Animal farm di G. Orwell dal XIX secul.

Marisa e à i voi lancurôs ancje par lis cjasis da la sô infanzie:
“cjasis vueidis, bandonadis, ch’a son come musis senze voi, un cuarp senze cour. Enfri li’ stanziis, picjadis tai mûrs, a restin ancjemò li’ ridadis, li’ cisicadis, i moments di gjonde, li’ lagrimis di cui che i è tocjât di vivi li, come raps ch’a madressin tal ultin soreli di une sierade rivade masse adore...”.

E da un cuc, Marisa, ancje a lis strussiis da la vite moderne, fevelant di governants, di migrants, di storie da la Piçule Patrie, da lis tragjediis tai mârs di vuê.
Ma plui di dut, di chestis contis al ven fûr il timp, il timp da la lizerece di cûr, da la purece dai sentiments, dal rispiet. E palese scuasit il desideri che ce che nus conte al rivi tal cûr “a cui che il ridi al à dismenteât”.

La lenghe, lis peraulis dopradis, a parin vignî fûr da la sô pene cidinis cidinis, sudizionosis. La lôr delicatece e mostre cetante sensibilitât e cetant rispiet pai sentiments: “L’aiarat invessit al veve dentri di se un grant sens artistic: cuant che la nêf a scomenzave a colâ, al faseve in môt che i ocs a deventassin tantis paveis blancjis e li’ faseve svualâ ator, l’aghe la faseve deventâ tocs di diamants e cul so â lizêr li’ nulis a deventavin bombâs.”

Lis contis di Marisa a son deventadis pineladis di un cuadri di un Friûl pierdût, che je e calcole, mediant di chest scrit, ancjemò il so santuari, dulà lâ a polsâ cui siei ricuarts di frute.

30 altri prodotti della stessa categoria: