Nuovo Le Blancje di Culugne Visualizza ingrandito

Le Blancje di Culugne

per info elisa@chiandetti.it

Nuovo prodotto

Autore: Maurizio Busolini
Illustratore: Paolo Borgna

Maggiori dettagli

Dettagli

Prefazion

Cheste e je “une storie”... su lis origjinis dal paîs di Culugne che si lee a “une liende” (un pôc vere e un pôc inventade) sucedude in timps lontanonons e disvilupade ta chest luc; sintude in maniere direte dai vons che a son lâts purtrop aromai al Creatôr, in part di chei vecjos paisans che ancjemò si impensin alc di tramandât e, in part, ancje sgarfant fûr blecs di scrits tai libris antîcs, ta chei plui modernis e tes mapis di ogni epoche che o soi rivât a cjatâ.

Ben, o ai cirût di meti adun ducj chei fruçons dal passât che a fevelassin di chest luc (che viôt il câs al è propit il gno), a tacâ di dutis chês sclesis di ricuarts di ognidun e po, cjalant cun atenzion ancje il gno teritori, i soi trois, lis sôs stradis, cjalant cun passion ducj chei vieris claps doprâts par tirâlu sù, chei restâts a rodolâ tai cjamps daspò des araduris e ancje chei bandonâts, chei scartâts, chei butâts in bande sui confins e chi o là, chei mai considerâts se no di une semplice voglade o di une pidade par pôre di no inçopedâsi.

Cussì, o soi restât cun plasê ben maraveât di tropis robis che a son saltadis fûr e di ce tantis dongje che a saressin di contâ.

O ai scrusignât e sbisiât par tancj agns te mê biele tiare dopo une vivarose e intense sglavinade coventade a lavâ e slacâ il polvar, par fâ lusî un clap, un tocut di crep o une scaie di veri. O varès cjapât in man cetancj tocs di piere o altri mai coventâts a nuie... a di nissun, cirint di dâur une identitât... cirîur une forme, une someance cuntun altri imprest, par po tignînt di cont ancje cualchidun. Chei altris, cun displasê par lôr, ju varès tornâts a butâ, vie, li che ju vevi cjatâts, saludantju: “Mandi! A riviodius! Sperìn che o vedis plui fortune...”.

Cetantis voltis, mi soi cjatât ancje a cjaminâ sui prâts in bande lis rivis dal gno antîc torint che al lenç i confins dal comun, a cirî di discuviarzi cualchi olme dal passât, cualchi repert, par rinfuarcî, par confermâ e dâ valôr a chês testemoneancis sintudis, a chês cjatadis e a chês imagjinadis... e alc al è vignût fûr.

Mi sarès vignude cussì la pice di scrivi (a fuarce di vitis) ce che o ai sintût... e contâus ce che o varès in part cjatât, ancje zontant cualchi alc par rivâ a indreçâ e tacâ (o ingredeâ) la conte, par no piardi chês provis e dismenteâ propit su dut.

Cualchidun plui studiât di me al podarès dî che chestis a son dome un grum di fufignis, nainis cence valôr, sflocjis, bufulis cence nissune fonde di veretât... ma no je cussì! Us al garantìs che cetantis robis contadis tal mieç di chestis pagjinis no son luianiis: a son fats sucedûts pardabon, storiis veris, realmentri esistudis, e dopradis propit dai nestris vons vivûts culì.

Ben, o speri che al podedi jessi un viaç tal timp no dome pal letôr atent, passionât e amant de storie mai scrite dal paîs di Culugne, ma che al podedi sedi ancje un spont, une imboconade par ducj chei di une cualsisei altre vile dal nestri Friûl... par contâ.

O volarès dome vê il gust di fâus imagjinâ, di fâ fantasticâ ognidun su lis propriis lidrîs, di rivâ a fâus scuviarzi alc di plui di ce che o crodês di savê... alc di veretât e cualchi faule, fâus ghiti e plasê di cirî di capî un piç dai tancj misteris che ogni borc al à vût prime o dopo, o a pene nassût, o muart bielzà.

Cualchi veretât e cualchi flabe a voltis si imberdein... fatalmentri, e a nassin cussì storiis di paîs, di lucs, di sbilfs, di striis, di aganis... di int e di robis restadis scuindudis daûr di un mûr, jenfri lis sôs sclapaduris o platadis tal ort, tun foran, te boschete, sot di une trâf de vecje lobie, imbusâts inte cjanive dentri di une cassele plene di strafaniçs, sot di une piastrele de cusine sporcje, intun sucrit... o dismenteadis tal scansel di un scabel tal cjast de memorie.

Lassant pûr che la fantasie e cori... e insumiâsi, contant po cence pôre di vignî criticâts o ridûts vie, sorâts, ancje parcè che si sà che al sarès plui facil fâ come che e dîs la detule: “Par che a disin ben di te, no sta a fâ nuie”.

A ogni mût, une storie... une conte, une flabe o une liende che si rispietedi no pues che tacâ cussì:
“Al jere une volte…”

30 altri prodotti della stessa categoria: