O Vienna velika che tanto t'amai Visualizza ingrandito

O Vienna velika che tanto t'amai

per info elisa@chiandetti.it

Nuovo prodotto

Autore: Gianni Marizza

Maggiori dettagli

Scheda tecnica

Pagine 576
ISBN 9788896304266
Genere Storia
Lingua Italiano
Formato 15x20,5

Dettagli

Dalla prefazione di Ferruccio Tassin

Uera che no coventava dal ’15; no spietada da pura int ta nestris tiaris: veva za la gosa plena. A pletôns, partîts oms e zovins, tal ’14: Serbia e la Galizia, pa uera che l’Austria veva impiât.
Vignî tacâts dai Taliâns no si la spietavisi. Nancia a Triest, zitât dal Luctentent dal Litorâl. Là, al conta un scritôr, una femenuta, viazant sul tram, cuant che à savût, à suspirât: “No dovevin fanus chista: l’era za un an che pativin!”.
Se mût pensala?! Si lava a marciât a Palma; al cuitrabant al “judava” - di cà e di là. Furlan e talian di cà e di là; stessis ciampanis par clamâ la int a preâ l’stess Diu. A Guriza, nôms da stradis taliâns; tal 1865, vevin mitût un bust di Dante ta sala dal Consei comunâl. Miârs di Talians lavoravin cun nô… e petanus chista! Int che lava a bevi insieme, a cjalâsi di stross par papagai che orevin uera, tun parlament talian cuintra. Lagi daûr a strassaperaulis, nazionalisç fraits, come D’Annunzio… no si podeva crodi!
Vegnin di cà i Talians: si maravèin che nissun gi fasess fiesta. Parfin i predis, tal puest di chei che i Talians vevin internât in Italia, no rivavin a capî la situazion. Un, a San Vit al Tôr, al fevelava in glesia dal “nemico” di cà, dal “nemico” di là; li feminis àn duvût frontalu, digi che chei erin i soi ùmins! Un altri, a Visc, don Attilio Ostuzzi (gjornalist e diretôr dal “Crociato”), al scriveva che al doveva tornâ a dai la cjaria a la vôs da “razza”, distudada dai zinc secui dal “dominio austriaco”!
Sessanta predis dai nestris àn partât via. Par fâ cualchi numar, plui di 350 personis dome ta Bassa: di chei che si vevin impegnât ta politica catolica-popolâr e socialista par tirâ fûr la pura int da miseria. I paîs si emplavin di ospedali, zimiteris; e saress stada la liberaziòn?!
La uera era za bruta par sô cont, e viodi pi di cualchi predi dai nestris pestât in plazza a Palma e int in preson senza prozes, e clamala liberazion?! Di cui? Erino cuintra l’Italia chei dal Friûl cu l’Austria; no! scrupulavin dome che, par essi Taliâns e Furlâns, no coventass essi irredentisç. No l’è di contâ che foss int ignoranta: cuasi duç a savevin lêi e scrivi; al popul al rivava a fâ, come me barba Toni Padovan di Ruda, parfin la sesta class. La nestra int vaiva pai sôi, e pai Taliâns, come chei sfusilâts a Saciletto (soranomenât Fuciletto). Aquilea, pa storia, faro dal cristianesim, centro di manifestaziôns di un moviment catolic madûr e fuart in politica (sufragio universâl za dal 1907), si capotta tun nazionalisim bols: al sfrutava muarts pa violenza, in nom da stirpe latina; trasfigurava dolôr, reâl, vêr, in propaganda.
Dome un esempli di “liberazion”: a Visc, paisut par zinc secui sul cunfin fra cultura latina, slava, todescja, ongiaresa, uera vivuda da banda austriaca, cun dignitât e lealtât. In altris bandis, ta vilia dal intervent, si davigi gloria a la uera: a Pordenon (23 di mai): “…si ciata ancia int che a uel partî… e tentâ di rivâ al spetacul sul cunfin di Visc o di Cormons… ilusion che li patuglis dai carbinirs a scancèlin subita cul fermâ lis autos dai Podenonês e mandaiu a cjasa…”.
A Palma, al comandant dal “Cavalleggeri Roma” gi nunzia ai soldâts al privilegjo di lâ, prims “a liberâ da jôf stranîr i fradis che suspiravin al ‘riscatto’, e al bussa cun passion al standard fra i berlis di gjonda e il deliri di duta la int”. “Visco nostra”: si varess sintût in Sicilia; gnova come se foss zitât fissa fissa di int; fin za cualchi an, al berli, di serio, l’era doventât un cioli via.
“Il 24 di mai li trupis talianis entrin a Visc senza sbarâ un colp. Visc al è ormai part del bel Paese là ove dolce il sì suona. Par via che la stessa zornada l’era stât internât al Decan, il doi di zùin l’era comandât di rezi chista parochia decanâl al predi don Attilio Ostuzzi”.
La nota dal plevan a conta una veretât dramatica. Il sì al sunava prima, cà, tal biel paîs, e ta chê part di un altri Stât; al sunava benòn ancia par via di scuelis di gala. L’ocupazion italica, inveze, no partava la pâs, ma à sglavinat disgraziis, dolôr, piardita da autonomia, vendetis ferozis di ogni sorta, fasint zinisa di ogni concuista economica e sociâl, par splancâgi la strada a la ditatura - orenda - da fassina cul manarin!
A si doprârin peraulis tristis, pa nestra int: una soradut, “austriacant”, ch’a era propi fûr dal dut. La Contea di Guriza, difati, gi à ladi ai Asburgs, par ereditât, dopo da muart dal ultin cont di Guriza, Leonardo, e Triest a fesè, tal 1382, un at di dedizion a l’Austria!
Al generâl Gianni Marizza, che di cà indevant al uel parâ ju, scancelâ propi dal dut, bausiis impeoladis tal fevelâ di ogni dì, ta publicistica e parfin ta storiografia, l’à pensada una vora ben a contâla justa.
E dopo l’à fat un at di chel spirt che i Româns clamavin “pietas”, che no ûl dì pietât, ma un sintiment una vora plui profond. Zirî al nom dai muarts. Muarts nestris lontan lontan che spietin anciamò che cualchi delegazion dal Stât talian (la Patria gnova) al ledi a cjatâju, come che 60 predis a spietin la riabilitazion, par essi stâts maltratâts e deportâts senza prozes!

30 altri prodotti della stessa categoria: